Wednesday, November 2, 2011

இன்னமும் இந்தியனாகவே இருக்கிறேன்


காஷ்மீர் முதல் கன்னியாகுமரி வரை
இந்தியா என்றது பள்ளிப்பாடம்.

ஆனால் காஷ்மீரில் பாதி இல்லை
அதில் நமக்கு உரிமையும் இல்லை
என்பது உண்மைப் பாடம்.

பெருமைக்குரிய ராணுவம்
எல்லையில் இழிச் செயல்களை
செய்ததென அறிந்தபோது எனது
இதயம் சிறிது கனத்தது.

காவிரி ஆணையத்தின் உத்தரவை
நிறைவேற்ற திராணியற்ற தேசம்
என்பதை உணர்ந்தபோது எனது
இந்தியம் சிறிது குறைந்தது.

கச்சத் தீவு தாரை வார்ப்பும்
மீனவர் தினமும் இறப்பதும்
எல்லையில்லா கோபத்தை ஊட்டினாலும்
நான் இந்தியனாகவே இருக்கிறேன்.  

ஈழத் தமிழரை கொல்ல ஆயுதம் தந்து,
போர்த் தந்திரம் தந்து போரை நடத்தியது
இந்தியாவென அறிந்த பின்பும்
இந்தியனாகவே இருக்கிறேன்


இன்னும் எத்தனையோ
தமிழின அழிப்புகள் நடக்கலாம்
என்று தெரிந்தும், இன்னமும்
நான் இந்தியனாகவே இருக்கிறேன்.